Komitado karon ang nagkalain-laing ahensya sa gobyerno nga membro sa Provincial Council for the Protection of Children (PCPC) alang sa kaayuhan sa mga kabataan dinhi sa Zamboanga del Norte.
Kini ang gipadayag sa mga miyembro sa maong konseho atul sa PCPC 3rd Quarter Meeting, Oktubre 25, niining tuiga nga gipahigayon sa Plenary Hall, Zamboanga del Norte Convention and Exhibition Center nga gipasiugdahan sa kagamhanang probinsyal pinaagi sa Provincial Social Welfare and Development Office (PSWDO).
Si PSWD Officer Dr. Jose Mante ang namahayag nga ang maong panagtigum maoy tukmang dalan o lugar aron mahisgutan ang solusyon sa mga problema nga giatubang karon sa komunidad alang sa mga kabataan.
Kini sama sa malnutrisyon diin ang Zamboanga del Norte anaa sa ikaduha nga dapit sa tibuok Zamboanga Peninsula.
Samtang daghan usab ang nahimong biktima sa pagpanglugos, dropouts sa mga tulunghaan ug uban pa.
Hinuon, sa report sa Department of Labor and Employment (DOLE) kini mitaho nga mikunhod ang kaso sa child labor sa probinsya gikan niadtong panahon sa pandemic. Sa bulan sa Nobyembre, isaulog ang National Children’s Month ug gikalatid nga mopabati sa iyang State of the Children Address si Governor Jalosjos tentatibo sa Nobyembre 23.
Nasayran nga ang PCPC gilangkuban sa buhatan sa DOLE, PHO, DepEd, Provincial Nutrition Office IBP ug uban pang pribadong sektor.
(Source: Provincial Government of Zamboanga del Norte Facebook page)