Ang mga personahe sa Godod Municipal Police Station (MPS) aktibong misalmot sa gipahigayon nga Blood Letting Activity niadtong nakalabayng adlaw didto sa Barangay Raba, Godod, Zamboanga del Norte.
Ang kalihokan gipasiugdahan sa Dr. Jose Rizal Memorial Hospital uban sa pakigtambayayong sa Godod Rural Health Unit. Tumong niini ang pagpalambo sa kahimsog sa komunidad ug ang pagdasig sa mga residente nga mosalmot sa pagdonar og dugo aron makatabang sa mga pasyenteng nagkinahanglan.
Ang mga personahe sa kapulisan mipahimutang og seguridad aron masiguro ang kaluwasan ug hapsay nga pagpadayon sa kalihokan, ilabi na alang sa mga partisipante, boluntaryo, ug medical staff nga aktibong misuporta sa maong inisyatibo.
Sumala sa Godod MPS, ang ilang aktibong partisipasyon nagpamatuod sa padayon nilang suporta sa mga programa sa komunidad, dili lamang sa kalinaw ug seguridad, apan apil usab sa mga inisyatibo alang sa kahimsog ug kaayohan sa katawhan.(Jumalisa Papa)
Source: Godod MPS