Ang mga personahe sa Dapitan City Police Station, pinaagi ni PSSg Manuel Projo, nagpahigayon og lecture kabahin sa Crime Prevention Month alang sa mga estudyante sa Baylimango National High School sa Barangay Baylimango, Dapitan City, niadtong Setyembre 4, 2025.
Sa maong lecture, gipasabot ang Republic Act 11313, nga nailhan nga Safe Spaces Act o “Bawal Bastos Law,” ug Presidential Decree 603, o Child and Youth Welfare Code of the Philippines. Tumong niini nga mapalig-on ang kahibalo sa kabataan bahin sa ilang katungod ug responsibilidad, ingon man ang kahinungdanon sa paglikay sa bisan unsang porma sa harassment ug paglapas sa ilang katungod.
Ang kalihokan kabahin sa mas lapad nga kampanya sa kapulisan sa pagsaulog sa National Crime Prevention Month, diin giila usab ang papel sa kabataan sa pagpanguna sa kalinaw ug kahusay sa ilang komunidad ug tunghaan.
Gilauman nga pinaagi sa pagpahigayon sa awareness lectures sama niini, mas mapaabot sa kabataan ang tinuod nga mensahe sa kampanya batok sa krimen ug mapalambo ang aktibong kooperasyon tali sa kapulisan, mga magtutudlo, ug estudyante alang sa mas luwas ug malinawon nga katilingban.(Jumalisa Papa)
Source: Dapitan CPS