Pinaagi sa mensahe ni Governor Darel Dexter T. Uy nga gihatud ni Third District Board Member Leo Mejorada, gihatagan og dakong pag-ila ang kakugi ug paglahutay sa mga mag-uuma atol sa culmination program sa ZAMPEN SIVI Project.
Gipasiugda sa mensahe ang importante nga papel sa mga mag-uuma sa pagseguro sa food security ug pagpalig-on sa sektor sa agrikultura sa Zamboanga del Norte.
Gipasalamatan usab niini ang mga mag-uuma, lokal nga opisyal, agricultural workers, project partners, ug mga benepisyaryo nga mitampo sa kalampusan sa programa.
Gihatagan og pag-ila ang East-West Seed Knowledge Transfer Philippines tungod sa paghatod og dugang kahibalo, teknolohiya, ug oportunidad ngadto sa mga mag-uuma aron mapalambo ang ilang produksyon ug paggamit sa mas malungtarong pamaagi sa pagpanguma.
Gipasalamatan usab ang Department of Agriculture Regional Field Office 9, mga municipal agriculturists, local government units, ug uban pang stakeholders sa ilang padayong suporta sa proyekto.
Bisan natapos na ang ZAMPEN SIVI Project, gilauman nga magpadayon ang paggamit sa mga mag-uuma sa ilang nakat-unan nga kahibalo ug kahanas alang sa mas lig-on nga panginabuhian ug agrikultura.
Uban sa panawagan nga “Kuyog Ta,” giawhag ang mga mag-uuma ug stakeholders nga ipadayon ang panaghiusa ug pagtinabangay alang sa mas mauswagon nga kaugmaon sa agrikultura sa Zamboanga del Norte.(IKEN B. GULLEM)
Source: Zamboanga del Norte Provincial News Network