“Ako, sa ngalan sa mga residente ug mga opisyales sa Barangay Galas, nagpasalamat ug dako kang Governor Rosalina “Nanay Nene” Jalosjos sa pagpahigayon ug Medical and Dental Outreach Program atol sa ika-61 ka tuig nga anibersaryo sa Barangay Galas.”
Mao kini ang giluwatan ni Galas Punong-Barangay Angelito Nob.
Matod pa ni Kapitan Nob, kini nagumikan sa hiniusang pagpaningkamot sa konseho sa Barangay Galas ug sa suportang gilugway ni kanhi Zamboanga Sibugay Governor Rommel Jalosjos ug Provincial Administrator Mr. Wilberth “Jojo” Magallanes nga mapaabot kang Governor Jalosjos ang hangyo sa mga Galasnon nga mapahigayon ang Medical and Dental Outreach Program sa ilang barangay atol sa maong okasyon.
Lakip sa mga serbisyong gilugway sa mga personahe sa Provincial Health Office (PHO) ug Zamboanga del Norte sa Barangay Galas ang libreng medical and dental consultations uban ang libreng tambal.
Sa 544 nga nakapahimulos sa Medical and Dental Outreach Program, 319 ang nahatagan ug libreng konsultasyon ug mga tambal, 198 ang naibtan ug ngipon, ug 77 ka mga bata ang natuli.
Matod pa ni Ms. Alma Tyrus, kinsa usa ka nakapahimulos sa maong programa, dako kining tabang sa mga residente, ilabi na karon nga misaka tanang presyo sa mga palaliton.
Nagpasalamat usab si Ms. Tyrus sa liderato ni Kapitan Nob, tungod kay nahiusa niini ang katawhan sa Galas alang sa ilang kalambuan.
Sa samang higayon, nanawagan si Kapitan Nob sa taga-Galas nga pabiling managhiusa alang sa katumanan sa ilang gidamgong kalambuan.
Iya usab nga gihangyo ang iyang kaubang mga opisyales sa Barangay Galas nga ihatag ang tiunay nga serbisyo sa katawhan, subay sa panultihon ni Governor Jalosjos nga “Misyon Ko, Tinuod nga Serbisyo.” (Angelica T. Obina)
(Source: PIC-ATRuda via Provincial Government of Zamboanga del Norte)