Dul-an 20 sa mga meat handlers, merchants ug stall owners ning dakbayan ang mipailalom sa Food Safety Orientation adlawa nang Hunyo 15, sa Dapitan City Government Center.
Ang nahisgotang aktibidad gipasiugdahan sa National Meat Inspection Service (NMIS)-Regional Technical Operation Center 9 sa pakigtimbayayong sa City Veterinarian’s Office ubos sa pagdumala ni Dr. Roy Pagador.
Mamumulong sa okasyon ang mga personahe sa NMIS nga sila Dino Sumalinog, Geovannie Roy Quintas, ug Mark Petter Codino kinsa mipasabot sa limpyong pag-ihaw sa hayop ug insaktong pagdala sa karne niini aron mahimong “fit for human consumption”.
Usa ka attached agency sa Department og Agriculture (DA) ang NMIS ug sila gihatasan sa pagpahigayon sa tinuig nga inspection ug surveillance aron masigurong limpyo ug dili double dead ang tanang baligyang karne alang sa kaluwasan sa mga konsumante.
Aktibong mitambong usab sa tibuok durasyon sa kalihukan si City Councilor Jezebel “Bing” Balisado kinsa maoy mirepresentar ni outgoing Mayor ug incoming Zamboanga del Norte Governor Rosalina “Nene” Jalosjos.
Nanghinaut ang buhatan sa veterinarian nga pinaagi sa tabang ni Coun. Balisado mapanday ning tuiga ang Meat Inspection Ordinance ning syudad nga maoy mamahimong basehan sa pag-imposar sa mga penaltiyang mahiaguman sa mga makalapas niini.
Subling gipahimangnuan usab ni Dr. Pagador ang tanang nanag-iya ug meat shops ug stalls sa pampublikong merkado nga ila lamang ipaihaw ilang hayop sulod sa Slaughter House diin nahimutang sa Dapitan City National High School Compound.
(Source: City Information Division-CID-Dapitan Facebook page)