Gipangunayan mismo ni Mayor Evelyn T. Uy, ang Programa alang sa mga Mag-uuma sa Barangay Ma. Uray sa dakbayan sa Dapitan, diin ang nasangpit nga aktibidad, didto mismo gipahigayon sa Covered Court sa nasangpit nga Barangay, sa may alas 3:30 sa hapon, Agusto 18, 2025.
Nasayran nga ang nasangpit nga mga programa, gilangkuban sa pag-released sa mga dagko ng Semilya sa Red Tilapia, gikan sa buhatan sa City Agriculture sa Dapitan, nga gipangunahan ni City Agriculturist Cyril Patangan, nga mao usab mismo ang nahimong katimbang ni Mayor Uy, sa pagpahigayon sa nasangpit nga aktibidad.
Lakip usab nga gitunol sa maong higayon ang usa ka Unit sa Mudboat, alang sa mga miyemro sa Farmer’s Association sa Barangay Ma. Uray, maingon man ang mga sinako nga Urea nga 46-0-0, ug ang nagkadaiyang mga Seedling’s sa mga Utanon, diin gikalipay og dako sa mga katawhan sa naasoy nga Barangay, ang pagpadangat sa programang pang-agrikultura sa ilang dapit, nga mismong ang Mayor pa sa Dapitan, ang personal nga mitunol niini.
Atol sa pagbarog ni Mayor Evelyn T. Uy atubangan sa mga miyembro sa Ma. Uray Farmer’s Association, bahin sa tipik sa mensahe nga iyang giluwatan, iyang gina-awhagan ang mga miyembro sa maong grupo, nga maghiusa ug magtinabangay, alang sa ikalambo sa mga mag-uuma, ug alang usab sa kalampusan sa ilang mga tinguha.
Mipasalig usab si Mayor Uy, sa mga katawhan sa nahisgutang Barangay, nga kutob sa iyang mabuhat, iyang singkamutan, nga makadangat sa matag Barangay, ang mga programa sa Gobyerno, ilabina ang kabahin sa Agrikultura, nga maoy nag-unang paninguhaan sa mga katawhan sa dakbayan sa Dapitan, ning Probinsiya sa Zamboanga Del Norte.(Julius Esmade)
Source: CITY GOVERNMENT OF DAPITAN