Adunay 250 ka runners ang partisipante sa 10-kilometer Malindang Run 2 nga ipahigayon karong Sabado, Agosto 10.
Kini magsugod sa Gantao Hills, Barangay Tuburan, lungsod sa Sergio Osmena, ning lalawigan ug mopadung ngadto sa Barangay Nueva Vista (kanhi Mansawan), lungsod sa Don Victoriano, Misamis Occidental ug mobalik sa Gantao Hills.
Sa nasayran gikan kang Atty Orlando “Jun” Salatandre, Presidente sa Mt. Malindang Cross Border Tourism nga kini nga kalihukan subay sa pagsaulog sa Malindang Week ug aron usab ipakita sa katawhan nga luwas ug malinawun ang maong lugar alang sa mga dumuduong nga dili lamang nagagikan dinhi sa nasud kondli lakip na usab sa mga langyaw nga turista.
Lakip sa mga partisipante nagagikan sa Zamboanga del Norte Police Provincial Office, 97th IB sa Philippine Army, Don Victoriano PNP ug uban pang pribadong sektor ug indibidwal.
Ang Malindang Run 2 adunay duha ka kategoriya nga mao ang 39 years old Below-male and female ug 40 years old Up-male and female.
Gikahinaman usab ang presensya ni PBA Legend Alvin Patrimonio kinsa mao usay pinasidunggang dinapit ni Atty Salatandre atul usab sa kasaulogan sa iyang adlaw’ng natawhan nianang adlawa.
Anaa usab sila si Miss ZaNorte 2024 Janine Yve Fortulazo, 1st Runner Up-Liza Mae Ruiz, 2nd Runner Up Lexandrea dela Cerna ug Miss Dapitan 2nd Runner Up Seana Kyth Elola.
Kini nga kalihukan gipaluyuhan usab sa Nature’s Spring, Empal Car Rental Services pinaagi ni SIcayab Punong Barangay Joe Chris Empal, Gantao Hills pinaagi ni Mr. Bong Bomediano, Villa Pablea pinaagi ni Atty Jun Salatandre ug Artyard Arts and Advertising ni Mr. Rey Villaverde ug ang Mt. Malindang Cross Border Tourism.
Ang Malindang Run 2 nagdala sa tema “Kalikasan Kaakibat sa Kinabukasan”. (Angelica T. Obina)
(Source: Sheng Bala)