Gatusan ka mga boluntaryo gikan sa nagkalain-laing sektor ang nagtinabangay sa usa ka dakong coastal cleanup sa daplin sa Dapitan Sunset Boulevard isip kabahin sa pagsaulog sa 41st International Coastal Cleanup (ICC) Day.
Ubos sa tema nga “Clean Seas for Resilient Communities,” nagtigom ang mga kawani sa city government, provincial government, national government agencies, mga non-government organizations (NGOs) ug civic volunteers aron makatampo sa paglimpyo sa baybayon ug pagpanalipod sa kadagatan batok sa polusyon.
Gipakatap ang mga empleyado sa lokal nga panggamhanan sa nagkalain-laing coastal stations diin sila nagtinabangay uban sa ubang partisipante sa pagkolekta sa mga basura ug pag-atiman sa kabaybayonan sa Dapitan.
Gitambongan usab sa mga lokal ug provincial officials ang opening program sa kalihokan. Lakip sa mga anaa mao si Dapitan City Vice Mayor Gabriel M. Cad, mga miyembro sa Sangguniang Panlungsod, ug 1st Congressional District Board Member Jimmy Patrick Israel Chan.
Mitambong usab si Charmie Yu, Acting Provincial Administrator sa Zamboanga del Norte, uban sa mga representante sa Department of Environment and Natural Resources (DENR), lakip si CENRO Piñan Officer Eugene S. Celi ug Mary Emma Mallari, Chief sa Coastal Resources Management Unit.
Dili lamang paglimpyo sa baybayon ang gihatagan og pagtagad sa kalihokan. Gipadagan usab sa DENR-CENRO ang sistematikong pagrekord sa mga matang ug gidaghanon sa basura nga nakolekta.
Ang matag grupo gihatagan og Volunteer Ocean Trash Form aron maitala ang klase ug gidaghanon sa ilang nakolektang basura. Ang maong datos gamiton sa mga environmental officers sa pag-ila sa mga kasagarang tinubdan ug dagan sa marine pollution ug sa pagpalambo sa mga pamaagi sa waste management.
Ang tinuig nga coastal cleanup gihimo subay sa Presidential Proclamation No. 470, series of 2003, nga nagdeklara sa ikatulong Sabado sa Septyembre isip International Coastal Cleanup Day sa Pilipinas.
Gipasiugda sa mga organizer nga ang maong kalihokan dili lamang usa ka adlaw nga pagpanglimpyo, kondili usa usab ka paagi sa pagpalapad sa kahibalo sa hustong pagdumala sa basura ug pag-awhag sa komunidad nga magpadayon sa pagpanalipod sa kadagatan.(IKEN B. GULLEM)
Source: Dapitan City Government