Nasulbad na ang dugay nang problema sa kakulang sa tubig ilabina sa sentrong bahin sa lungsod sa Sindangan, human kini matagad pinaagi sa mga inisyatibo nga gisugdan sa kanhi mayor Rosendo “Dodoy” Labadlabad ug karon padayon nga gipakusgan ni Mayor Glona Labadlabad.
Ang suplay sa limpyo ug mainom nga tubig nagagikan sa mga tinubdan sa Barangay Disud, Bato, Caluan ug Mandih, nga nagserbisyo sa daghang komunidad sa lungsod. Lakip sa mga barangay nga nakabenepisyo mao ang Poblacion, Gampis, Lawis, La Roche, Bantayan, Piao, Goleo, Disud, Calatunan, Binuangan ug Magsaysay.
Sumala sa lokal nga panggamhanan, padayon ang mga lakang aron mas mapalapdan pa ang serbisyo. Giandam karon ang pag-abli sa dugang linya sa tubig padulong sa mga hilit ug suok nga lugar—usa ka plano nga nagsunod sa mga proyekto nga nasugdan na kaniadto.
Pinaagi niini nga paningkamot, tumong sa administrasyon nga masiguro nga matag panimalay sa Sindangan adunay akses sa limpyo ug igo nga suplay sa tubig, isip pundasyon sa kahimsog ug kalamboan sa komunidad.(IKEN B. GULLEM)
Source: Other Media Outlet