Nakadawat og dakong pag-ila ang Lokal nga Pangagamhanan sa Liloy ubos sa pagpangulohan ni Mayor Roberto Lim Uy Jr. human gihatagan og award sa Department of Health pinaagi sa Philippine Multisectoral Nutrition Project atol sa Project Implementation Review ug Ceremonial Turnover sa Performance-Based Grants Tranche 2.
Gikabig sa Liloy ang duha ka prestihiyosong awards, ang Health Promotion Grant Award ug ang Performance-Based Grant Award, nga nagpakita sa lig-on nga liderato, hapsay nga pagdumala sa pondo, ug epektibong health communication initiatives sa munisipyo.
Gipasalamatan ni Mayor Uy ang tanang PMNP partners ug iyang gidayeg ang Rural Health Unit sa Liloy nga gipangulohan ni Dr. Nanette Digamon, kauban si Dr. Ma. Lourdes Langco, tungod sa ilang walay kakapoy nga paningkamot alang sa kahimsog sa komunidad.
Kini nga kalampusan nagpalig-on sa tumong sa lokal nga pangagamhanan nga padayon nga palambuon ang mga programa sa nutrisyon ug panglawas, aron masiguro ang mas himsog ug mas lig-on nga kaugmaon sa katawhan sa Liloy.(JENIFFER JR. DELICA)
Source: Municipality of Liloy