Misalmot ang Probinsya sa Zamboanga del Norte sa nasudnong inisyatibo nga “Constructing Our Future,” usa ka programa sa gobyerno nga nagtumong sa pagpalig-on sa imprastraktura sa edukasyon sa tibuok nasud.
Kini nga kalihukan, gipangulohan ni Ferdinand “Bongbong” Marcos Jr. ug gipatuman pinaagi sa Department of Education (DepEd), diin aktibong mitambong ang delegasyon gikan sa Zamboanga del Norte ubos sa liderato ni Gov. Darel Dexter T. Uy.
Ang programa kabahin sa mas lapad nga plano sa nasyonal nga gobyerno aron matubag ang dugay nang kakulang sa mga classroom sa nagkadaiyang bahin sa nasud. Ilabi na kini sa mga probinsya nga nag-atubang og pagdagsa sa enrollees ug kulang nga pasilidad, nga nakaapekto sa kalidad sa pagtudlo ug pagtuon sa mga estudyante.
Pinaagi sa pag-apil sa mga local government units (LGUs) sama sa Zamboanga del Norte, gipaabot nga ang LGU adunay mas aktibong papel sa pagplano, implementasyon, ug pagmonitor sa mga proyekto tungod kay mas suod kini sa aktuwal nga kahimtang sa matag tulunghaan sa ilang nasakupan.
Lakip sa mga prayoridad nga gihisgutan mao ang rehabilitasyon sa mga karaan ug nadaot nga eskwelahan, pagtukod og bag-ong classroom aron malikayan ang pagsiksikan sa mga estudyante, ug pagpalambo sa kinatibuk-ang kahimtang sa mga pasilidad pang-edukasyon aron masiguro ang luwas ug komportable nga palibot sa pagtuon.
Gipadayag sa probinsya nga padayon nilang gihatagan og dakong bili ang edukasyon isip pundasyon sa kalamboan sa Zamboanga del Norte. Pinaagi sa mas lig-on nga koordinasyon tali sa nasyonal nga gobyerno ug lokal nga liderato, gitinguha nga masiguro nga matag batang Zanortehanon makatuon sa dekalidad nga palibot.(IKEN B. GULLEM)
Source: Zamboanga del Norte Provincial News Network