Nakadawat og libreng konsultasyon, tambal ug bitamina ang mga lumad nga Subanen sa Barangay Bulawan, Katipunan, Zamboanga del Norte pinaagi sa Kuyog Ta, Medikal ug Serbisyo Caravan.
Gipahigayon ang kalihokan aron mahatagan og batakang serbisyong panglawas ang mga residente sa hilit nga komunidad nga kasagarang adunay kalisod sa pag-access sa medikal nga serbisyo.
Ang Barangay Bulawan usa ka komunidad nga gilangkuban sa mga Subanen, diin daghang residente ang mipahimulos sa libreng check-up ug uban pang serbisyo nga gidala sa caravan.
Sumala sa Provincial Government of Zamboanga del Norte, kabahin kini sa ilang paningkamot nga madala ang serbisyong panglawas ngadto sa mga lumad ug mga komunidad nga layo sa sentro aron masiguro nga walay mabiyaan sa pagdawat sa gikinahanglang pag-atiman.(JENIFFER JR. DELICA)
Source: Zamboanga del Norte Provincial News Network