Libre nga prenatal ug maternal health services ang gipadangat sa mga mabdos gikan sa nagkalain-laing bahin sa Zamboanga del Norte atol sa “Buntis Congress” nga gipahigayon niadtong Septiyembre 23, 2026.
Gipangunahan sa Provincial Government of Zamboanga del Norte, ubos sa pagdumala ni Governor Darel Dexter T. Uy, pinaagi sa Office of the Provincial Health Officer (OPHO), ug sa pakigtambayayong sa Provincial Department of Health Office-Zamboanga del Norte (PDOHO-ZDN), ang kalihokan nga nagtumong sa pagpalambo sa luwas nga pagmabdos ug pagpanganak ug pagpakunhod sa maternal ug infant mortality.
Gitigom sa maong health campaign ang nagkalain-laing health institutions, government offices ug stakeholders aron direktang mapadangat sa mga mabdos ang gikinahanglang serbisyo.
Lakip niini ang libre nga prenatal check-up, vital signs ug health assessment, ultrasound, laboratory screening ug nutrition counseling. Anaa usab ang mga health services booth nga naghatag og maternal ug child health services, nutrition counseling ug breastfeeding education.
Mitabang usab ang mga doktor ug health personnel gikan sa Dipolog City Medical Society Obstetrics and Gynecology, nga nagpahigayon og medical consultation ug laboratory screening alang sa mga partisipante.
Naghatag usab og libre nga HIV/AIDS testing ang Dipolog HIV Hub, samtang ang ChildFund Philippines Foundation, Inc. ug Uni-Soft Hygienic Products mitampo sa kalihokan pinaagi sa paghatag og hygiene kits ngadto sa mga mabdos.
Sa mensahe ni Governor Darel nga gipaabot ni Board Member Kay Marie Bolando-Villarin, iyang gipasiugda ang dakong papel sa mga inahan sa pamilya ug komunidad, ilabina ang panginahanglan sa hustong pag-atiman ug suporta atol sa pagmabdos.
Kabahin sa kalihokan ang Maternal Health Talk nga gipangulohan ni Dr. Jezza Elcullada, diin gihatagan ang mga mabdos og impormasyon bahin sa hustong pag-atiman sa kaugalingon ug mga pagpangandam alang sa luwas nga pagpanganak.
Gihatagan usab og higayon ang mga partisipante nga malingaw pinaagi sa “Binibining Buntis Zanorte,” diin gipakita sa mga mabdos nga kandidata ang ilang pagsalig ug kahimtang isip mga inahan ug umaabot nga mga ginikanan.(IKEN B. GULLEM)
Source: Zamboanga del Norte Provincial News Network