Mokabat sa 47 ka TUPAD beneficiaries sa Siocon ang nakadawat og technical training nga direktang gilambigit sa ilang mga buluhaton isip temporary workers sa lain-laing community projects.
Ang maong programa naghatag sa mga benepisyaryo og oportunidad nga makakuha og praktikal nga kahanas samtang nagtrabaho, aron ang ilang kasinatian dili kutob sa temporaryong employment apan mahimong magamit pa sa umaabot.
Napulo ug siyam (19) ka beneficiaries nga magtrabaho sulod sa 45 ka adlaw ang gibansay sa basic plumbing, ilabina sa piping installation ug repair sa water system sa LGU.
Gipangunahan ni Engr. Benjie Corbita, usa ka Master Plumber, ang hands-on training diin gipakita ang mga basic nga pamaagi sa plumbing ug piping work nga ilang magamit sa aktuwal nilang trabaho.
Samtang, 28 ka TUPAD beneficiaries nga gi-deploy sa Canatuan National High School nakakompleto na sa 20 ka adlaw nga trabaho alang sa rehabilitation ug maintenance sa eskwelahan human sa magnitude 7.1 nga linog niadtong Hunyo 2026.
Naglakip sa ilang mga buluhaton ang pagsemento sa mga pathway, paglimpyo sa debris, pagpangtanom og kahoy, paghimo og compost pits ug pag-establisar og vegetable gardens sulod sa school grounds.
Pinaagi sa hands-on training ug actual work experience, ang mga TUPAD beneficiaries nakakuha og dugang nga praktikal nga kahibalo samtang nakatampo sa mga proyekto nga direktang nakabenepisyo sa ilang komunidad.
Kini nga inisyatiba nahiuyon sa developmental thrust sa DOLE-IX Regional Director Albert E. Gutib nga palig-onon ang epekto sa TUPAD pinaagi sa paghiusa sa temporaryong trabaho, skills development ug produktibong community work.(IKEN B. GULLEM)
Source: DOLE Liloy Satellite Office