Nagpadayon ang Provincial Government of Zamboanga del Norte sa paghatod og serbisyong medikal pinaagi sa Ayuda Medikal Plus Program ni Governor Darel Dexter T. Uy, lakip ang libre nga konsultasyon alang sa mga pasyenteng adunay surgical ug cancer-related nga mga kondisyon.
Pagahimoon ang Free Check-Up karong Septyembre 24, 2026, alas 8:00 sa buntag, sa Zamboanga del Norte Medical Center (ZNMC) Out-Patient Department (OPD).
Ang mga residente mahimong makapakonsulta nga walay bayad ngadto sa mga espesyalistang doktor alang sa lain-laing kondisyon sama sa breast mass, thyroid disorders, hernia, hemorrhoids, tumor, liver cases, hepatobiliary ug pancreatic conditions, ingon man uban pang cancer-related nga mga sakit.
Manguna sa konsultasyon si Dr. Jonathan Navarro, General Surgeon ug espesyalista sa Hepatobiliary ug Pancreatic Surgery ug Liver Transplantation, uban ni Dr. Imeldo Gamallo II, Oncologic Surgeon nga nag-atiman sa mga pasyenteng adunay kanser.
Sumala sa ZNMC Medical Team, kabahin kini sa padayon nga paningkamot sa paghatod sa serbisyo panglawas ngadto sa katawhan, ilabina sa mga kondisyon nga nagkinahanglan og espesyalista ug tukmang medical evaluation.
Gidasig usab ang mga residente nga adunay susamang sintomas o kondisyon nga mopahigayon og konsultasyon sa maong libre nga health screening aron masusi sa mga espesyalista ang ilang kahimtang ug mahatagan og angay nga tambag bahin sa posibleng pagtambal.
Ang maong libre nga serbisyo naghatag og dugang oportunidad sa mga residente sa probinsya nga makapakonsulta sa ilang mga problema sa panglawas nga walay bayad, isip kabahin sa paningkamot nga mapalapad ang access sa kalidad nga serbisyong medikal ngadto sa mga komunidad.(IKEN B. GULLEM)
Source: Zamboanga del Norte Provincial News Network