Gipahigayon sa Zamboanga del Norte Medical Center (ZNMC) kagahapon, Nobyembre 22, 2025, ang usa ka libreng pediatric check-up ug major operations alang sa mga kabataan sa probinsya nga nagkinahanglan og espesyal nga medikal nga atensyon.
Sulod sa programa, 17 ka batang pasyente ang na-check up, ug lima kanila gikinahanglan pa dad-on sa Cebu alang sa mas espesyal nga treatment. Lima usab ka bata ang nakabenepisyo sa major operations, gikan sa nagkalain-laing lungsod sama sa Lumbayao, Tampilisan, Liloy, New Siare, Siayan, Rizal, ug San Vicente, Dapitan.
Sa laing bahin, 31 ka pasyente ang na-screen alang sa ‘Operation Smile,’ usa ka programa nga naghatag og libre nga operasyon sa mga bata nga adunay cleft lip ug palate. Ang operasyon ipahigayon karong Nobyembre 24-29, 2025, ubos sa pangalagad ni Dr. George Williams, espesyalista sa facial surgery.
Ang programa usa ka kolaborasyon sa Provincial Government of Zamboanga del Norte ug Rotary Club of Dipolog. Gipakita niini ang komitment ni Gobernador Darel Dexter T. Uy sa paghatag og kalidad nga healthcare sa tanan, labi na sa mga kabus nga walay kakayahang magbayad sa medikal nga serbisyo.
Ang mga pamilya sa mga pasyente nagpahayag sa ilang dako nga pasalamat, samtang ang programa nagpangayo og dakong kalipay ug paglaum alang sa mga kabataan sa probinsya.(JENIFFER JR. DELICA)
Source/Photo Courtesy: Zamboanga del Norte Provincial News Network