Gipunting sa Barangay Health Workers (BHW) Federation sa Zamboanga del Norte ang pagpalig-on sa serbisyong panglawas human maghiusa ang mga lider-BHW sa usa ka provincial meeting nga nagtuki ug nag-update sa mga programa alang sa komunidad.
Gipahigayon ang maong tigum sa 4th Floor Function Hall sa Top Plaza Hotel ug gitambongan sa 38 ka presidente ug sekretarya sa BHW gikan sa nagkalain-laing lungsod lakip ang Dapitan, Dipolog, Polanco, Sergio Osmeña, Mutia, La Libertad, Piñan, Sibutad, Rizal, Katipunan, Roxas, ug Salug.
Sa maong panagtigum, gi-review ug gipalig-on ang implementasyon sa kasamtangang health programs aron masiguro ang mas epektibo ug organisadong paghatag serbisyo sa matag barangay.
Gidawat usab ang mga partisipante ni Gobernador Darel Dexter T. Uy, nga mipasiugda sa dako nga papel sa mga BHW sa pag-atiman sa panglawas sa komunidad, ug nagdasig sa padayon nilang dedikasyon sa serbisyo publiko.
Samtang, nagpasalamat si Provincial Health Officer Dr. Benson Panaguiton sa walay kakapoy nga paningkamot sa mga BHW ug sa lig-on nga backing sa probinsyal nga pangagamhanan sa mga programang panglawas para sa tanang residente sa Zamboanga del Norte.(IKEN B. GULLEM)
Source: Zamboanga del Norte Provincial News Network