Nasikop ang usa ka Street Level Individual nga tigpayuhot sa illegal nga droga, atol sa gipahigayon nga Anti-Illegal drug operation didto sa Brgy. Poblacion, Siocon Zamboanga del Norte niadtong nakalabay’ng adlaw.
Naila ang dinakpan nga si alias “Totoh” lalaki, minyo, mangingisda kinsa gidakop tungod sa kasong kalapasan sa Republic Act 9165 o ang Comprehensive Dangerous Drugs Act of 2002.
Ang maong operasyon gipangulohan sa Siocon Municipal Police Station kauban ang Zamboanga del Norte Police Drug Enforcement Unit (ZN PDEU) ug 905th Regional Mobile Force Battalion 9 (RMFB9).
Nakumpiska gikan sa suspetsado ang usa ka gamay nga heat-sealed transparent plastic sachet nga shabu nga nagsilbing buy bust item ug laing pang 9 ka gamay nga heat-sealed transparent plastic sachet nga shabu nga nakuha gikan sa iyang possession.
Dugang nasakmit ang 500 peso bill nga buy bust money, upat ka gatus ug 50 pesos cash nga lain-lain ang denomination, usa ka itom nga wallet, ug usa ka unit nga Black Honda XRM 125 nga motorsiklo.
Mokabat sa pito ka gramos, ang mga nakumpiskang droga nga nagkantidad og Php 47,600.00.
Ang dinakpan anaa na sa kostodiya sa Siocon Municipal Police Station, alang sa tukmang disposisyon.(Jumalisa Papa)
Source: Siocon MPS