Nagpahigayon og consultation workshop ang Department of Health – Zamboanga Peninsula Center for Health Development ug ang Provincial DOH Office sa Zamboanga del Norte alang sa draft Implementing Rules and Regulations sa Republic Act No. 12261, nga nagtukod sa Liloy General Hospital. Gihimo ang kalihokan niadtong Marso 12 sa Andres Rafael Hall sa Mibang Hotel.
Gipangunahan ang workshop ni Augusto Manolo G. Alpichi, nga nagtumong sa pagkuha sa mga suhestiyon ug rekomendasyon sa mga stakeholder aron masiguro nga kompleto ug angay sa panginahanglan sa kahimsog sa lokal nga komunidad ang IRR sa maong balaod.
Mitambong sa konsultasyon si Adrian Michael A. Amatong, Roberto Lim Uy Jr., ug Benson Panaguiton, kauban ang mga opisyal sa DOH ug mga representante gikan sa nagkalain-laing government hospitals sa probinsya.
Sa maong workshop, gihiusa ang mga input ug rekomendasyon sa mga partisipante aron mapalambo pa ang draft IRR ug mapadayon ang sunod nga proseso sa pagpatuman sa balaod alang sa pagtukod sa Liloy General Hospital.(JENIFFER JR. DELICA)
Source: DOH Zamboanga Peninsula CHD