Nasakmit sa kapulisan ang gibanabanang ₱992,020 nga kantidad sa gituohang puslit nga sigarilyo atol sa checkpoint operation sa Border Control Point sa Barangay Gatas, Kalawit niadtong milabay nga adlaw.
Nahitabo ang operasyon mga alas-5 sa hapon nga gipahigayon sa mga personnel sa 2nd Platoon sa Zamboanga del Norte 2nd Provincial Mobile Force Company (ZN 2nd PMFC), uban sa koordinasyon sa Kalawit Municipal Police Station (MPS).
Nasita sa checkpoint ang usa ka light gold nga Suzuki Every Wagon nga giingong misulay og likay human gipahunong sa mga personnel. Matud sa kapulisan, mipadagan ang drayber sa sakyanan ug gisundan kini sa operating team.
Sa ulahi, gibiyaan sa drayber ang sakyanan ug mikalagiw ngadto sa wala matino nga direksyon. Samtang, usa ka pasahero nga nagpabilin sulod sa sakyanan ang nadakpan alang sa verification ug hustong dokumentasyon.
Sa pagsusi sa sakyanan, nakit-an sa mga awtoridad ang upat ka master cases ug 57 ka reams sa gituohang puslit nga Red New Far cigarettes.
Gibanabanang mokabat sa ₱992,020 ang kantidad sa mga sigarilyo base sa Standard Price Index sa Bureau of Customs (BOC).
Nakigkoordinar dayon ang operating team sa BOC alang sa aktuwal nga inventory ug verification sa mga nakumpiskang produkto. Gihimo ang inventory sa presensya sa mga saksi gikan sa barangay ug media.
Ang mga nakumpiskang sigarilyo, ang sakyanan ug ang nadakpang pasahero gitugyan ngadto sa Kalawit MPS alang sa dokumentasyon, imbestigasyon ug hustong disposisyon subay sa kasamtangang balaod ug pamaagi.(IKEN B. GULLEM)
Source: PNP Zamboanga del Norte 2nd PMFC