Mokabat sa 300 ka native trees ug bamboo seedlings ang gitanom daplin sa mga suba sa Barangay Sibalic, Gutalac, atol sa usa ka tree-growing activity ubos sa Climate Care Project.
Miapil sa kalihokan ang 24 ka TUPAD beneficiaries, upat ka personnel sa Department of Labor and Employment (DOLE) Liloy Satellite Office, ug duha ka personnel sa Public Employment Service Office (PESO) Gutalac.
Gipangulohan ug gipadagan ang kalihokan sa Xavier Agricultural Extension Service Foundation, Inc. (XAESFI), implementing partner sa ChildFund, uban sa mga community mobilizers.
Sa wala pa ang tree-growing activity, mitabang ang mga TUPAD beneficiaries sa pag-andam sa planting stakes, paghimo sa mga lungag ug pagbutang sa tree guards.
Ang pagtanom sa mga kahoy ug kawayan gitumong sa pagpalig-on sa mga daplin sa suba, pagpakunhod sa soil erosion ug pagtabang sa pagpugong sa pag-anod sa yuta panahon sa kusog nga ulan ug pagbaha.
Miapil mismo sa pagpugas sila Keeva Duffey, Global Senior Advisor sa ChildFund, ug Sylvia L. Acebes, Deputy Executive Director sa XAESFI, uban sa ilang mga community mobilizers.
Gipasiugda sa kalihokan ang panagtinabangay sa mga TUPAD beneficiaries, lokal ug nasyonal nga mga ahensya sa gobyerno, ug development partners alang sa pagpanalipod sa kalikupan ug pagpalig-on sa climate resilience sa komunidad.(IKEN B. GULLEM)
Source: DOLE Liloy Satellite Office