Miabot sa kapin ₱2.4 milyon ang danyos sa dakong sunog nga miulbo kagahapon kadlawon, Sabado, Enero 10, 2025, sa Sitio Riverside, Villagonzalo 1, Barangay Tejero, Siyudad sa Sugbo. Gibana-bana nga kapin 80 ka mga balay, lakip ang mga barong-barong, ang gilamoy sa kalayo.
Sumala sa Cebu City Fire Office (CCFO), nadawat ang alarma sa sunog alas 5:22 sa kadlawon ug miabot ang unang fire truck alas 5:32. Tungod sa kusog nga kalayo ug dikit-dikit nga mga panimalay, gisaka dayon sa unang alarma ang insidente.
Human sa lima ka minutos, gisaka usab sa ikaduhang alarma ang sunog kay padayon ang pagkusog niini. Paglabay sa 17 minutos, gisaka pa gyud sa ikatulong alarma tungod sa paspas nga pagkatap sa kalayo, ug gikinahanglan ang dagkong water tanker aron mapadayon ang pagpasirit og tubig.
Sa inisyal nga imbestigasyon, nagsugod ang sunog sa panimalay ni Jonathan Duterte, nga dali nga mikatap sa silingan nga mga kabalayan. Tungod niini, kapin 90 ka pamilya o 400 ka indibidwal ang nawad-an og panimalay.
Gikatahong naangol si Jonathan Duterte human makaangkon og mga paso sa wala nga bukton. Padayon pa ang imbestigasyon sa CCFO aron mahibal-an ang tukmang hinungdan sa sunog.
Milungtad og hapit duha ka oras ang pagpakigbatok sa mga bombero batok sa kalayo ug gideklara alas 7:09 sa buntag nga napalong na ang sunog.
📸 CTTO
I via Renante Socia Lada