Gisugdan sa probinsyal nga pangagamhanan sa Zamboanga del Norte ang tuig 2026 pinaagi sa usa ka executive management meeting nga nagtumong sa klarong direksyon ug lig-on nga panaghiusa sa pangagamhanan, nga gipahigayon sa Provincial Capitol sa Dipolog City.
Gipangulohan ni Gobernador Darel Dexter T. Uy ang kalihokan ug gi-awhag ang mga opisyal sa panaghiusa ug disiplina sa trabaho alang sa mas epektibong serbisyo publiko.
Gisentro sa diskusyon ang pag-align sa mga plano sa 2026, lakip ang husto nga pagdumala sa pondo sa probinsya ug pagpaayo sa internal nga mga sistema sa matag buhatan. Gihisgutan usab ang pagpadayon sa mga proyekto sa imprastruktura ug ang kahinahanglan sa koordinasyon sa nasyonal nga mga ahensya alang sa paspas nga implementasyon.
Gihatagan og bili ang pagpanalipod sa kalikupan ug pag-andam batok sa climate change, uban ang pagpalig-on sa disaster preparedness.
Samtang, sa sektor sa sosyal ug ekonomiya, gipasiugda ang suporta sa kahimsog, edukasyon, agrikultura, ug social welfare.
Pinaagi sa open forum, gipadayag sa mga opisyal ang ilang suhestiyon alang sa pagpaayo sa operasyon sa probinsya.(IKEN B. GULLEM)
Source: Zamboanga del Norte Provincial News Network