Padayon gihapon ang Anti-Rabies Mass Vaccination Program sa Dakbayan sa Dapitan nga gipangulohan sa City Veterinary Office (CVO) aron masiguro ang kahimsog ug kaluwasan sa mga binuhi ug sa komunidad.
Sa miaging semana, nakaabot sa daghang barangay ang libre nga pagpabakuna isip kabahin sa paningkamot sa lokal nga kagamhanan batok sa rabies ug sa pagpalig-on sa responsableng pag-atiman sa mga hayop.
Sumala sa CVO, nabakunahan ang 92 ka iro ug lima ka iring sa Barangay Dawo, samtang 53 ka iro ug 12 ka iring ang nabakunahan sa Barangay Sta. Cruz. Sa Barangay Bagting, mikabat sa 84 ka iro ug upat ka iring ang napailalom sa anti-rabies vaccination.
Gipasalamatan usab sa opisina ang aktibong suporta sa mga opisyal sa barangay ug ang kooperasyon sa mga pet owners nga dako’g tabang sa kalampusan sa programa.
Padayon usab ang kampanya sa mosunod nga mga adlaw, diin naka-iskedyul ang pagpabakuna sa Barangay Linabo sa Enero 27 ug sa Barangay Potol sa Enero 28. Gidasig sa City Veterinary Office ang tanang tag-iya sa binuhi nga magpabiling alerto sa opisyal nga mga pahibalo sa iskedyul sa pagbakuna ug magtinabangay sa pagpugong sa rabies alang sa mas luwas ug himsog nga komunidad.(IKEN B. GULLEM)
Source: City Government of Dapitan