Napamatud-an ang 100% operational readiness sa Zamboanga Norte 2nd Provincial Mobile Force Company (PMFC) human kini makapasar sa kalit nga inspeksyon nga gipahigayon sa PIAS Red Team niadtong Abril 7, 2026.
Gipangulohan ni PMAJ Wilson Y. Bantayon, ang inspeksyon nagtutok sa pagsusi sa disiplina, kahapsay sa operasyon, ug kahanduman sa unit sa pag-atubang sa nagkalain-laing sitwasyon, lakip na ang emerhensya ug seguridad.
Base sa resulta, nakab-ot sa unit ang 100% attendance sa personahe, ug husto ang ilang deployment sa tagsa-tagsa ka area of responsibility, usa ka klarong timailhan sa lig-on nga liderato ug epektibong pagdumala. Nasuta usab nga limpyo ug organisado ang kampo ug opisina sa unit, nga nagpakita sa ilang disiplina ug kahapsay sa internal nga sistema. Sa personnel formation, nakita nga sakto ang pagsul-ob sa uniporme ug pagsunod sa grooming standards sa tanang miyembro.
Gihimo usab ang komprehensibong inventory sa mga armas, diin napamatud-an nga kompleto ug maayong kondisyon ang tanang issued firearms. Gisundan kini sa showdown inspection ug pagsusi sa Search and Rescue (SAR) equipment.
Sa maong inspeksyon, nasuta nga andam ang matag personahe pinaagi sa ilang Go Bags nga kompleto sa essential items sama sa first aid kits, suga, ug personal safety equipment—hinungdan nga masiguro ang ilang kahanduman sa oras sa kalamidad o operasyon.(IKEN B. GULLEM)
Source: Zamboanga del Norte 2nd PMFC