Gihatagan og pag-ila sa City Government of Dapitan ang KALIPI Federation Presidents ug mga solo parent employees isip kabahin sa pagsaulog sa National Women’s Month pinaagi sa usa ka Advocacy Orientation nga gipahigayon niadtong milabay nga adlaw sa Amphitheater, Government Center.
Gipangunahan sa City Social Welfare and Development Office (CSWDO) ang kalihokan nga nagtumong sa pagpalig-on sa kahibalo sa mga solo parents kabahin sa ilang mga katungod ug benepisyo ubos sa Expanded Solo Parents Welfare Act o Republic Act No. 11861.
Atol sa programa, gipasiugda ang importante nga papel sa KALIPI leaders ug solo parents sa komunidad, ilabi na sa ilang kontribusyon sa pagpalambo sa pamilya ug katilingban.
Samtang, gipangunahan ni City Legal Consultant Atty. Metsuyo Smilen Barite-Galorio ang diskusyon, diin iyang gipasabot ang mga probisyon sa balaod ug gitubag ang mga pangutana sa mga partisipante pinaagi sa open forum.
Dugang pa, nagpasalamat ang mga gitambongan kang Mayor Evelyn “Belen” T. Uy alang sa padayon nga suporta sa mga programa para sa solo parents. Ang presensya usab ni Hon. Alexandra Judith P. Meily nagpamatuod sa suporta sa Sangguniang Panlungsod sa maong inisyatiba.(IKEN B. GULLEM)
Source: City Government of Dapitan