Naghiusa ang mga kabatan-onan gikan sa nagkalain-laing lungsod ug munisipyo sa Zamboanga del Norte atol sa Linggo ng Kabataan o LNK 2026 niadtong Agosto 22, 2026 sa Dipolog City. Gipasiugda sa maong kalihokan ang partisipasyon sa kabatan-onan pinaagi sa Unity Parade nga gitambongan sa mga youth leaders, organisasyon, ug partner groups sa probinsya.
Gipaila usab sa mga organisasyon ubos sa Provincial Youth Development Council o PYDC ang ilang mga programa ug adbokasiya pinaagi sa mga booth, lakip ang ICAN Young People Organization, Red Cross Youth Zamboanga del Norte, United Youth Movement ZDN, Uzad Ka Zampen, Supreme Student Council Society of the Philippines o SSCSP, ug United Students for Eco Impact o USEI. Naghatag usab og oportunidad sa mga kabatan-onan ang YORP Onsite Registration Booth ug DICT eGovPH Booth alang sa pag-access sa mga serbisyo ug programa.
Mitambong sa selebrasyon si Governor Darel Dexter T. Uy, samtang mipadayag og mensahe sa suporta si Representative Irene “Ai” Labadlabad sa Second District. Apil usab sa mga bisita ug resource speakers sila Atty. James Ceasar A. Ventura sa National Youth Commission, Ms. Pauline Barcia sa SK Secretariat, LTC Jessie Bergonia sa 97th Infantry Battalion, Ms. Maria Theresa Paquibot, ug Ms. Diana Acaylar.
Gipuno usab sa mga kalihokan sama sa Mr. and Ms. LNK ZANORTE 2026 ug LNK Quiz Bee pinaagi sa Kahoot! Live ang selebrasyon. Pinaagi sa pagtinabangay sa Technical Working Group, United Youth Movement Dipolog, Provincial Engineering Office, mga lokal nga pangagamhanan, youth organizations, government agencies, partner institutions, volunteers, ug supporters, nahimong higayon ang LNK 2026 alang sa kabatan-onan nga makigbahin, makig-connect, ug mapalambo ang ilang papel sa komunidad.(JENIFFER JR. DELICA)
Source: Zamboanga del Norte Provincial News Network