Malampusong napatigayon ang usa ka Joint Feeding program, didto sa Brgy. Don Elino, Serio Osmeña ning lalawigan sa Zamboanga del Norte, adlaw nga Sabado, Hulyo 27, 2024.
Ang maong kalihokan gipangulohan ni Atty. Jun Salatandre uban sa pakigtambayayong sa mga personahe sa Philippine Army pinaagi ni Lt. Soliman nga nag representar sa 97th Infantry KALASAGLAHI Battalion, ug sa koordinasyon sa Philippine Eagles Club, Mt. Malindang Crossborder Tourism kauban ang Oracis Team nga gipangulohan ni Dr. Rey Acis, kauban ang mga personahe sa Media, ug sa partisipasyon sa mga opisyales sa Brgy. Don Elino, Serio Osmeña nga nakig koordenar, pinaagi ni Brgy. Kapitan Asterio Abila inubanan sa iyang mga konsehales sa maong Barangay sa napahigayon ug malampusong programa, diin mukabat sa kapin 100 ka mga bata kauban ang mga ginikanan nga lumolupyo sa maong Barangay ang naapod-aporan sa Jollibee food packs.
Kini nga hiniusang inisyatiba, nagpakita ug nagpamatuod sa maayong buhat nga makahatag ug kalipay, pinaagi sa pagahin ug pagkaon isip gasa alang sa mga kabataan.
Si Brgy. Kapitan Abila sa Brgy. Don Elino, mipadayag sa iyang pasalamat ngadto sa mga nagpaluyo sa maong programa, nga bisan pa sa kahilit nga dapit nga nahimutangan sa ilang Barangay, nahatagan gihapon kinig kahigayon sa mabisitahan aron sa pagpahigayon sa usa ka Joint Feeding program alang sa mga kabataan nga nahimuyo sa Brgy. Don Elino, Serio Osmeña.
Sa samang higayon, sa paghinapos sa programa, Si Atty. Salatandre nipaambit sa iyang usa ka mahinungdanong mensahe alang sa mga kabataan ug ngadto sa mga mitambong sa programa nga bisan sa gamay nga pamaagi makatampo ang hiniusang paningkamot nga aporan ug pagkaon ang mga kabataan sa maong Barangay ug lakip usab niini ang pagpadayon sa suporta sa maayong pag uswag ug padayon nga paglambo Turismo sa Serio Osmeña, Zamboanga del Norte. (Medalyn U. Borja)