Gipunting sa hiniusang panagtigom sa Local Council Against Trafficking and Violence Against Women and Children (LCAT-VAWC), Local Council for the Protection of Children (LCPC), ug City Inter-Agency Council (CIAC) ang pagpalig-on sa mga Barangay Violence Against Women and Children (VAWC) Desks isip unang linya sa tabang ug proteksyon alang sa mga biktima sa komunidad.
Gisusi sa mga konseho ang kahimtangan sa operasyon sa mga Barangay VAWC Desks, lakip ang mga hagit sa pag-report, referral, ug paghatag og hustong serbisyo sa mga biktima sa kababayen-an ug kabataan. Gitumong sa diskusyon ang panginahanglan sa mas lig-on nga koordinasyon, ug padayon nga monitoring aron masiguro ang episyenteng pagdumala sa mga kaso sa barangay level.
Samtang, atol sa kalihokan present si City Social Welfare and Development Officer Patrick S. Jalapadan, Assistant CSWDO Jovencia D. Gregory, ug si City Councilor Hon. Praxides P. Rubia nga misalipod sa City Mayor Roberto Y. Uy ug mipangulo sa diskusyon, kauban ang mga representante sa nagkalain-laing ahensya.
Gisangkapan usab ang miting sa presentasyon sa mga accomplishment report sa 2025, lakip ang Women and Children Protection Desk (WCPD), Women’s Center, Drop-In Center, ug Center for Children with Special Needs (CCSN), nga nagpakita sa padayon nga paningkamot sa syudad sa pagpalambo sa mga serbisyong sosyal.
Pinaagi sa maong hiniusang kalihukan, gipadayag sa lokal nga panggamhanan sa Dipolog City ang lig-on nga panindugan sa paghatag og mas duol, mas paspas, ug mas epektibong proteksyon.(IKEN B. GULLEM)
Source: City Government of Dapitan