Aron masiguro ang malinawon, hapsay, ug luwas nga pag-obserbar sa Undas 2025, giaktibar sa Local Disaster Risk Reduction and Management Office (LDRRMO) sa Liloy ang Incident Command System (ICS) isip kabahin sa Oplan Kaluluwa 2025.
Gihimo sa Incident Management Team (IMT) ang Operational Period Briefing alang sa tanang personnel nga gipakatap sa nagkadaiyang lugar. Gihisgutan usab niini ang mga operational assignment, safety protocol, ug koordinasyon tali sa mga ahensya alang sa operasyon.
Uban sa panaghiusa sa LDRRMC member agencies, partner agencies, ug force multipliers, gipakatap ang mga personahe sa mga sentrong dapit ug sementeryo aron maghatag ug daliang assistance ug magbantay sa kaluwasan sa publiko sa duha ka adlaw nga kalihokan.
Gipahinumduman usab ni Liloy Mayor Roberto L. Uy ang tanan nga mag-obserbar sa disiplina, kalimpyo, ug seguridad samtang mobisita sa ilang mga minahal nga namatay.(IKEN GULLEM)
Photo courtesy: Municipality of Liloy