Sakit paminawon nga mikayod sa pagpanagat ang amahan tungod ug alang sa iyang pamilya nga igo nalang sa hilak ang iyang nakitang naugdaw ang balay lakip sa pagkasunog ang iyang asawa ug anak niining 6-day old, human gilamoy sa kalayo ang ilang panimalay kagahapon sa kadlawon sa Brgy. Sicayab, Dipolog City.
Giila ang biktima nga si Lyza Dumiande, 16 anyos kinsa bag-ohay pa lamang nanganak.
Base sa inisyal nga impormasyon, usa ka lamparilya ang gamit sa biktima isip suga sa ilang balay. Gumikan kay anaa sa bungtod nahimutang ang maong balay giingong naglisud ang mga bombero sa pagpakgang sa kalayo nga miresulta sa pagkaugdaw niini lakip na ang mga biktima.
Wala usab damha sa bana sa biktima ang maong panghitabo diin nasayran nga bag ohay lang kining mibiya sa ilang panimalay aron managat.
Sa karon mipaabot ug pasiunang tabang ang Barangay alang sa pagplastar sa patay’ng lawas sa biktima. (Angelica T. Obina, photo courtesy by Jingle Gallardo)