Hapsay nga napahigayon ang Ligtas Christmas Fourth Quarter Media Forum karong adlawa, Disyembre 2, 2025, nga gilunsad sa Department of Health Center For Health Development Zamboanga Peninsula inubanan sa Provincial Health Office Zamboanga del Norte.
Gipatuman ang maong panagtigum sa Mibang Hotel, Dipolog City og gitambungan kini sa mga media personnel gikan sa nagkalain-laing mga estasyon sa dakbayan.
Gipatuman ang maong forum arun maghatag og mga lakang sa mga indibidwal og mga pamilya kung unsaon pagselebrar ang umaabot nga Pasko nga layo sa posibleng disgraya, kakulian, og peligro.
Ang tibuok nga diskusyon nagtuyok sa pagpresentar og pagpasabot sa respetado nga mga speakers kabahin sa ilahang tagsa-tagsa nga mga gipiling hilisgutanan nga haom sa ilahang kahibalo og espesyalisasyon.
Unang gituki ang bahin sa “Fire Crackers Ban” ubos sa programa nga “Iwas Paputok, ” kung asa gipaabot ni PLT Marlon H Duran ang ka-importante sa pagkabalo sa mga pwede og bawal nga pamaliton og ipamaligya nga klase sa mga pabuto.
Gisundan kini sa pagpunting sa Dipolog City Traffic Management Plan nga maayung gihan-ay og gipreparar ni PCPT ROEL L TALAID. Gihingusgan usab ni PSSC. Ma. Riffy C. Balingit ang importansya sa pagka-alerto og pagka-mabinantayon pinaagi sa paghatag og Crime Prevention Tips.
Gitutukan usab ni SFO1 Mark Jefferson S Canggas ang saktong pagtudlo mahitungod sa Fire Cracker Injuries, samtang gi-awhag ni Health Education Promotion Officer II Fe D. Martalla ang publiko sa pagpili og saktong mga pagkaon atol sa iyang lektyur nga “Healthy Handaan. ”
Gitapos daun ang maong panagtigum pinaagi sa open forum kung asa ang tanan nga mga tigpamaba sa dakbayan, nahatagan og hustong tyansa nga makapangutana sa mga resource speakers og naglaom nga tanan nilang nahisgutan nga mga lakang og serbisyo, mamahimong magmalampuson karung padulungay nga Pasko.(JENIFFER JR. DELICA)