Malampusong nahuman sa Sergio Osmeña Sr. Infirmary (SOSIF) ang tulo ka adlaw nga “Hospital Free from Disaster” Program nga nagpalig-on sa kahanduman sa ospital batok sunog, linog, ug uban pang kalamidad.
Gipahigayon ang programa gikan Nobyembre 10 hangtod 12 uban ang suporta sa Sergio Osmeña MDRRMO ug Municipal Fire Station. Gisugdan kini pinaagi sa Basic Life Support–CPR Training alang sa 27 ka bag-ong personnel. Samtang, ang maong aktibidad gi-fasilitar sa ZNMC Health Emergency Management Services (HEMS) team nga gipangulohan ni Mr. Rommel C. Jamolod.
Gisundan kini sa Fire Safety Inspection nga gipangulohan ni SFO1 Trifons F. Grapa, ug sa usa ka earthquake drill nga gi-organisar ni Mr. Joseph S. Am-is sa MDRRMO. Human niini, gipahigayon ang post-activity evaluation diin gipaambit sa mga partisipante ang ilang mga natun-an ug rekomendasyon.
Matud ni Dr. Arjay A. Lao, OIC-Chief of Hospital, nga ang programa nagtumong sa pagpalig-on sa kahibalo ug abilidad sa mga kawani aron andam silang motubag sa emerhensya. Gipasalamatan usab ni Mayor Glen Yu ang tanang ahensya nga mitambong ug mipasidungog sa ilang paningkamot sa pagpanalipod sa kinabuhi ug kahimsog sa taga Osmeña.(IKEN B. GULLEM)
Source: Zamboanga del Norte Provincial News Network