Opisyal nang gitudlo si Engr. Camilo Gudmalin isip Commissioner sa National Commission of Senior Citizens (NCSC), nga gilauman nga magpalig-on sa mga programa sa gobyerno alang sa kaayohan sa mga senior citizen, ilabi na sa social protection, healthcare, ug pinansyal nga suporta sa tibuok nasod.
Si Gudmalin kaniadto nagsilbi isip Undersecretary sa Department of Social Welfare and Development (DSWD), diin adunay dakong papel sa pagdumala sa mga programa alang sa mga bulnerableng sektor, lakip ang senior citizens. Nakadala usab siya og kasinatian sa international development isip consultant sa World Bank ug Asian Development Bank.
Tungod sa iyang kasinatian, gilauman nga iyang mapalambo ang polisiya ug implementasyon sa mga programa sa NCSC, ug mapalig-on ang koordinasyon tali sa mga ahensya sa gobyerno ug mga lokal nga panggamhanan.
Sa iyang unang pahayag, gipasiugda ni Gudmalin ang panginahanglan sa inklusibo ug malungtarong mga programa aron padayon nga makabenepisyo ang mga tigulang sa responsableng serbisyo sa gobyerno.
Ang maong pagtudlo kabahin sa mas lapad nga paningkamot sa gobyerno sa pagpauswag sa social services ug pag-atiman sa nagkadaghan nga populasyon sa senior citizens sa nasod.(IKEN B. GULLEM)
Source: Zamboanga del Norte Provincial News Network