Gidapit sa kagamhanang probinsyal sa Zamboanga del Norte pinaagi ni Governor Rosalina “Nanay Nene” Jalosjos ang publiko sa pagsaksi sa Switch On Ceremony alang sa Pasko ZaNorte karong Nobyembre 29, sa may alas 5:30 ang takna sa hapon, Capitol Plaza, Estaka ning dakbayan sa Dipolog.
Sa pagpakighinabi ni Atty. Kathryn Zyra Saludsod, OIC sa Provincial Tourism Office kini ang namahayag nga ang tema sa Pasko ZaNorte niining tuiga mao ang Christmas Candyland, tungod kay buot sa inahan sa probinsya nga malingaw ang mga kabataan sa mga dayan-dayan sa Pasko sa Capitol Plaza.
Makita sa Christmas Candyland mao ang gingerbread house, candy canes, ice cones, ice cream doughnuts ug daghanan pang maanindot nga talan-awun niini. Si Atty Saludsod ang namahayag nga mamahimo usab kining madula-dulaan sa mga bata.
Dugang ni Atty. Saludsod nga makita usab ang giant Christmas Tree diin gi-design niini mao ang gingerbread house. Mamahimo kining masudlan sa mga bata sa ilawum niini tungod kay adunay gipahimutang nga mga lingkuranan sama sa usa ka sala sa balay, diin makita usab nga adunay fireplace. Adunay daghang pultahan ug bintana niini.
Mohatag sa iyang mensahe si Governor Jalosjos ug ang Switch On Ceremony sa mga dayan-dayan sa Captiol Plaza panguluhan kini ni Nanay Nene uban ni Acting Provincial Administrator Levy Lagutin, hepe sa mga buhatan sa kagamhanang probinsyal, Team GWAPO ug isunod gilayon ang Fireworks Display. Isunod gilayon ang Children’s Hour diin si Nanay Nene manghatag ug regalo alang kanila. Ilusad usab ang Paskong ZaNortehanon Official Christmas Jingle sa kagamhanang probinsyal sa Zamboanga del Norte.
Human niini, isunod ang Paskuhan sa Capitolyo Concert pinaagi sa D’7101 Talent Community ug ang Live Band aron sa paghatag ug lingaw sa katawhan.
Si Atty Saludsod ang nagkanayon usab nga matag Biyernes adunay ipahigayon nga kalingawan sa Capitol Plaza. Sa Desyembre 6, ipahigayon ang Pasko Entablado Singing Competition, Desyembre 13 Pasko Entablado Dance Competition ug sa Desyembre 19 ang Cultural Dance Competition alang sa mga kawani sa kagamhanang probinsyal sa Zamboanga del Norte nga ipahigayon sa Zamboanga del Norte Convention and Sports Center.
Niini, subling gidapit ni Atty Saludsod ang publiko sa pagsaksi sa Switch On Ceremony sa mga dayan-dayan sa Pasko sa Capito Plaza ug sa mga kalingawan nga nahisgutan sa unahan. (Angelica T. Obina)
(Source: PIC Zanorte)