Mipadayag sa iyang dakong suporta si Governor Rosalina “Nanay Nene”Jalosjos alang na sa tinguha sa kadagkuan sa Department of Health (DOH) ug uban pang development partners aron mapugngan ang pagkaylap sa Neglected Tropical Diseases (NTDs) dinhi sa probinsya sa Zamboanga del Norte. Kini ang tipik sa mensahe ni Governor Jalosjos kinsa mitambong sa pagsaulog sa World Neglected Tropical Diseases Day, Enero 30, sulod sa Zamboanga del Norte Convention and Exhibition Center, ning dakbayan sa Dipolog.
Gipasalamatan usab ni Gobernor Nene ang DOH ug ang development partners sa paghatag sa probinsya sa capacity-building, mga kalihukan, logistics ug commodities alang sa kampanya sa mass drug administration.
Ang pagsaulog sa World NTDs Day gipasiugdahan sa World Health Organization, DOH, kagamhanang probinsyal sa Zamboanga del Norte pinaagi sa Provincial Health Office. Sa mensahe usab ni Dr. Joshua Brillantes, ang Regional Director sa DOH Zamboanga Peninsula- Center for Health Development, iyang gidayeg si Nanay Nene sa iyang kaasgot sa pagsuporta sa maong kalihukan ug sa tanang health programs tungod kay isip usa ka nurse, prioridad sa administrasyon ni Gobernor Jalosjos ang mga programa sa maayong panglawas.
Nasayran nga ang NTDs mao ang mga sakit nga kasagarang mahitabo sa mga lugar nga nag-uswag ug adunay limitado nga access sa panglawas. Kini nga mga sakit kasagarang giisip nga dili importante tungod kay dili kini makapatay o makadala og epidemya sama sa ubang mga sakit.
Apan, ang mga NTDs mahimong hinungdan sa grabe nga pag-antos, kapansanan, ug pagkamatay. Ang maong kalihukan gitambungan usab ni Dr. Bayo Fatumnbi sa World Health Organization uban pang kadagkuan sa Central ug Regional Office sa DOH. Human sa maong programa, gihimo ang Press Conference tali sa miyembro sa local media nga gipahigayon sa Hall 3, Capitol Building.(Angelica T. Obina)
SOURCE: PIC-Sheng Jumalon Bala