Gimando ni Governor Darel Dexter T. Uy ang paspas ug komprehensibong imbestigasyon sa pagpamusil nga nahitabo sa Capitol Avenue, Dipolog City niadtong Hunyo 24 aron madakpan ug mapanagot ang mga responsable sa krimen.
Gipadayag usab sa gobernador ang iyang lawom nga pakigduyog sa pamilya sa namatay nga si Al Marlon Pagente Amorado ug gibutyag nga walay luna ang kapintasan ug kalapasan sa balaod sa Zamboanga del Norte.
Padayon ang koordinasyon sa Provincial Government sa mga opisyal sa Dakbayan sa Dipolog ug sa Philippine National Police aron mapalig-on ang seguridad, mapadali ang imbestigasyon ug mapreserbar ang kalinaw ug kahapsay sa probinsya.
Samtang nagpadayon ang dragnet operation ug gipalapdan ang police visibility, giawhag ni Gov. Uy ang publiko nga makigtambayayong sa mga otoridad pinaagi sa paghatag og impormasyon nga makatabang sa pag-ila ug pagdakop sa mga suspek.(JENIFFER JR. DELICA)
Source: Zamboanga del Norte Provincial News Network