Gilatag ni Governor Darel Dexter T. Uy ang mga prayoridad nga programa ug dagkong proyekto sa Zamboanga del Norte nga nagtutok sa pagkunhod sa kakabus ug pagpalapad sa oportunidad alang sa mga residente.
Gipresentar sa gobernador ang “KUYOG TA sa Bag-ong Zanorte” Poverty Reduction Agenda atol sa “Tambayayong Para sa Mas Malambuong Rehiyon: A Convergence Forum for Accelerated Poverty Reduction in Zamboanga Peninsula” nga gipahigayon sa Department of Economy, Planning, and Development (DEPDev) Region IX niadtong Hulyo 23 sa Mibang Hotel, Dipolog City.
Lakip sa gilatid nga prayoridad ang pagpalambo sa panglawas, edukasyon ug scholarship, grassroots infrastructure, panginabuhian, pagmugna og trabaho, agrikultura ug malungtarong kalamboan.
Gipasiugda usab ang mga dagkong proyekto sama sa Zamboanga Peninsula Expressway with Parallel Railway System, Provincial Agri-Industrial Center Development ug Dipolog Seaport Development, lakip ang mga programa sa agrikultura nga gilauman makapalig-on sa produksyon ug kita sa mga mag-uuma ug mangingisda.
Sa sektor sa panglawas, gilatid usab ang plano sa pagtukod sa Heart and Cancer Center sa Zamboanga del Norte Medical Center, pagdugang sa mga health personnel, pagpalapad sa telemedicine services ug pagpadayon sa Ayuda Medical Program.
Gilauman nga ang mga proyekto sa imprastraktura, agrikultura ug uban pang sektor makatampo sa pagmugna og trabaho, pagpadali sa transportasyon sa mga produkto ug pagdugang sa kita sa mga komunidad sa Zamboanga del Norte.
Gitambongan ang forum sa mga opisyal sa DEPDev, Department of Finance, National Anti-Poverty Commission (NAPC), regional line agencies, local chief executives ug development partners.(IKEN B. GULLEM)
Source: Zamboanga del Norte Provincial News Network