Gipakusog sa Bureau of Fire Protection (BFP) Godod ang kaandam sa komunidad batok sa sunog ug uban pang emerhensiya pinaagi sa Unified 911 Fire Square Roadshow nga gipahigayon sa Poblacion, Godod, Zamboanga del Norte niadtong Septiyembre 12,2026.
Ang kalihokan gipangulohan sa Godod Municipal Fire Station ubos sa pagdumala ni SFO1 Allain L. Dolar, Acting Municipal Fire Marshal, uban sa koordinasyon sa Municipal Disaster Risk Reduction and Management Office (MDRRMO).
Gitudloan ang mga partisipante sa hustong paglikay sa sunog, pagpangandam sa emerhensiya, batakang tubag sa insidente ug tukmang paggamit sa Unified 911 Emergency Hotline.
Misalmot usab isip lecturer si Jomarie Alfeche sa MDRRMO,kinsa mipadayag og praktikal nga mga pamaagi sa pag-atubang sa emerhensiya aron malikayan ang pagkawala sa kinabuhi ug dakong kadaot sa kabtangan.
Gipasiugda sa BFP Godod nga ang koordinasyon tali sa mga ahensya ug aktibong partisipasyon sa komunidad importante aron mas paspas ug hapsay ang pagtubag sa mga emerhensiya.(MEDALYN U. BORJA)
Source: BFP R9 Godod Municipal Fire Station