Misalmot si Zamboanga del Norte Governor Darel Uy sa Special Mindanao Development Authority Board Executive Session nga gipahigayon sa Malacañang Palace aron hisgutan ang mga nag-unang plano sa pagpalambo sa Mindanao. Mitambong usab sa maong tigum sila si Executive Secretary Ralph Recto, MinDA Chair Secretary Leo Magno, ug Education Secretary Sonny Angara.
Gituki sa sesyon ang mga estratehiya sa pamuhunan, pagpalig-on sa sektor sa agrikultura, ug mga reporma sa edukasyon nga gitutokan aron mapukaw ang tibuok potensyal sa Mindanao. Tumong sa miting ang pagpalig-on sa koneksyon sa mga rehiyon ug pagpadagan sa mas lig-on nga kalihokan sa ekonomiya.
Sa iyang presentasyon, gipadayag ni Gov. Uy ang mga flagship projects sa Zamboanga del Norte lakip ang plano sa pagtukod sa Zamboanga Peninsula Expressway, pag-upgrade sa Dipolog Airport ngadto sa international airport, ug pagpalapad sa Port of Dipolog. Matod pa niya, ang mga proyekto gilauman nga makahatag og dako nga kaayohan dili lang sa probinsya kundili sa tibuok Zamboanga Peninsula ug Mindanao.(JENIFFER JR. DELICA)
Source: Zamboanga del Norte Provincial News Network