Posibleng mapalambo pa ang access sa digital nga serbisyo sa mga komunidad sa Zamboanga del Norte human hisgutan sa Provincial Government ug Globe ang mga oportunidad alang sa mas lig-on nga koneksyon ug teknolohiya sa probinsya.
Gipresentar sa Globe kang Governor Darel Dexter T. Uy ang ilang mga plano ug inisyatibo alang sa Zamboanga del Norte, nga nagtumong sa pagpalig-on sa koneksyon ug pag-abli sa dugang nga digital solutions nga mahimong mapuslan sa mga residente ug lokal nga pangagamhanan.
Kabahin sa gihisgutan ang posibilidad sa mas suod nga pakigtambayayong tali sa Globe, Provincial Government ug mga local government units (LGUs) aron mailhan ang mga lugar diin ang telecommunications ug digital technology mahimong direktang makatubag sa panginahanglan sa komunidad.
Dili lamang mas paspas nga komunikasyon ang mahimong benepisyo sa mas maayong connectivity. Mahimo usab kini nga makatabang sa mas sayon nga pag-access sa government services, mas paspas nga pagpaambit sa impormasyon, online learning ug trabaho, ug mas lapad nga oportunidad alang sa mga negosyante nga makasulod sa digital markets.
Mahimo usab nga magamit sa mga lokal nga pangagamhanan ang teknolohiya aron mapauswag ang ilang paagi sa pagpakigsulti sa mga residente ug paghatod sa serbisyo, ilabina samtang nagkadaghan ang mga transaksyon ug public interactions nga mibalhin ngadto sa digital platforms.
Gidawat ni Governor Uy ang interes sa Globe nga makigtambayayong sa probinsya, nga nagpunting sa importansya sa panaghiusa sa gobyerno ug pribadong sektor aron makapangita og praktikal nga solusyon sa digital needs sa Zamboanga del Norte.
Gihisgutan usab ang posibleng mga lugar sa kooperasyon uban sa nagkadaiyang LGUs sa probinsya.
Samtang nagpadayon ang Zamboanga del Norte sa pagduso sa digital transformation, gilauman nga ang maong partnership mahimong makatabang sa pagpalig-on sa koneksyon tali sa gobyerno ug mga komunidad, pagpaayo sa serbisyo publiko, ug paghatag og mas daghang oportunidad sa edukasyon, trabaho ug panginabuhian.(IKEN B. GULLEM)
Source: Zamboanga del Norte Provincial News Network