Gipasiugdahan ang Football Tournament sa JRMSU Open Field sa Dapitan City isip kabahin sa selebrasyon sa Kinabayo 2026, diin nagtigom ang 63 ka youth teams gikan sa nagkalain-laing bahin sa Mindanao. Ang torneyo, nga giaprobahan sa Zamboanga del Norte-Dipolog Regional Football Association o ZANDIRFA, naglakip sa Under-9, Under-11, Under-13, Under-15 ug Under-17 nga mga kategorya.
Mikabat ang partisipasyon sa mga koponan gikan sa Iligan City, Cagayan de Oro, Manukan, Calamba, Oroquieta, Plaridel, Dipolog, Dapitan, Katipunan, Pagadian ug ubang kasikbit nga mga lungsod. Human sa unang adlaw sa kompetisyon, nasungkit sa Manukan United FC ang kampeonato sa Under-9, samtang naghari ang Manukan Futbolitos FC pinaagi sa pagdaog sa Under-11, Under-13, Under-15 ug Under-17 nga mga dibisyon.
Nakakuha usab og maayong pwesto ang Pala-O United FC sa Iligan City ug Jumbos United FC sa Pagadian City sa Under-9. Sa ubang kategorya, nahimong first runner-up ang SDU FC, Plaridel United FC Kiddos, JRV Sindangan FC ug DFA Patriots FC, samtang nakasulod usab sa mga top finishers ang DMC Vipers FC, Plaridel United FC ug Manicahan Milagrosa FC sa Zamboanga City.
Magpadayon ang torneyo karong adlawa pinaagi sa Open Division diin mag-atubang ang 11 ka teams sa Ladies Open, 22 ka teams sa Men’s Open ug 16 ka teams sa Men’s 40-and-Above Division. Sumala sa City Government of Dapitan, ang maong kalihokan nagpalig-on sa grassroots football development ug nagdasig sa panaghigalaay ug panaghiusa sa mga football communities sa tibuok Mindanao atol sa selebrasyon sa Kinabayo 2026.(JENIFFER JR. DELICA)
Source: Dapitan City Government