Dipolog: Entrapment operation batok sa illegal wildlife trading, gipahigayon sa DENR IX; 2 ka Phil Palm Civet na rescue

Anaa na sa luwas nga kahimtang ang duha ka mga Philippine Palm Civet kon (𝘗𝘢𝘳𝘢𝘥𝘰𝘹𝘶𝘳𝘶𝘴 𝘱𝘩𝘪𝘭𝘪𝘱𝘱𝘪𝘯𝘦𝘯𝘴𝘪𝘴), human kini ma-rescue sa PENRO Zamboanga del Norte, sa pakigtambayayong sa CENRO Piñan kauban ang Zamboanga del Norte Maritime Police Station, sa gipahigayong entrapment operation batok sa illegal nga pagbaligya sa wildlife, didto sa La Victoria, Munisipyo sa La Libertad, mga alas 11 sa buntag, Marso 22, 2024.

Sa gikasang operasyon,nadakpan sa raiding party ang usa ka 36-anyos nga lalaki kinsa suspek nga residente sa Barangay La Victoria ug matod pa maoy nangulo sa grupo sa Barangay Maligubaan, Concepcion, Misamis Occidental diin ang duha ka mga civet cats ang narekober ug na-rescue, kini mag-atubang sa kasong illegal possession and trading of wildlife (civet cats) nga kalapasan sa Sec. 27 (e), (f) sa RA 9147 nga nailhan usab nga Wildlife Resources Conservation and Protection Act.

Ang pag rescue gipasiugdahan sa Enforcement group sa PENRO Zamboanga del Norte nga gipangulohan ni Chief, Monitoring and Enforcement Section Amancio C. Onga, Piñan CENRO Adelaida Borja, MENRO Herfe Omalsa ug PNP Maritime personnel nga mibuhat og buy-bust operation sa illegal wildlife trader og mga civet cats nga nag protekta sa mga espisye ubos sa wildlife conservation laws.

Si kanhi Chief of Enforcement Division sa DENR Region IX ug kasamtangang OIC-PENRO sa Zamboanga del Norte Cidur S. Julsadjiri ang nag organisa sa maong entrapment operation, human mamonitor ang post sa usa ka Public Group sa Facebook nga “Dipolog Dapitan Koi Lovers,” pag-advertise sa maong wildlife para ibaligya.

Ang mga sakop sa Misamis Occidental, Maligubaan, nakig-alayon dayon sa raiding team sa CENRO Oroquieta ubos sa pagpangulo ni CENRO Guilry Cabatuan kinsa maoy mihimo sa pagsikop uban ni CENRO Borja, Maritime Police ug sa gi isip nga saksi nga mao si Maligubaan barangay councilor Norbert Cardro.

Si Oroquieta’s CENR Officer DMO V Guilry D. Cabatuan ug Chief of Monitoring and Enforcement Section Senior Ecosystems and Management Specialist Gema U. Alduhisa usab maoy personal nga midumala sa pag turnover sa naasoy nga wildlife ngadto sa ilang buhatan, ug ni-awhag sa publiko ilabina sa mga residente sa La Libertad ug Concepcion sa pagreport sa bisan unsang kadudahang mga kalihokan o mga krimen nga may kalabotan sa wildlife ngadto sa angay nga mga awtoridad.

Sa laing bahin, si DENR IX Regional Executive Director Arturo E. Fadriquela nag-awhag sa publiko sa pag-report sa bisan unsang mga higayon sa wildlife trading o uban pang ilegal nga kalihokan, sa pag paningkamot nga mapanalipdan ang mga endangered species ug mapreserbar ang biodiversity nga hugtanong gisuportaan nga conservation laws ug wildlife protection sa DENR.

Dugang pa, gipakosgan usab sa buhatan ang pagpakigbatok sa illegal nga wildlife trafficking ug uban pang krimen nga may kalabot sa wildlife lakip na ang pagpanalipod niini,nga gihimug-atan usab sa buhatan sa PENRO ug CENRO ZDN sa kahinguhaan sa wildlife sa probinsya sa Zamboanga del Norte.

Samtang,ang mga nasakmit nga wildlife gitugyan ngadto sa kustodiya sa CENRO Oroquieta alang sa dugang nga pagsusi ug gikinahanglan nga pag-atiman sa dili pa kini buhian balik sa ilang natural nga pinuy-anan ug alang sa tukmang pagpasaka og kaso batok sa suspek. (Medalyn U. Borja)

(Source: DENR Zamboanga Peninsula)