Dipolog: Duha Ka Mananagat Sa Barangay San Vicente Nabiktima Bagyong Maring Naayudahan Sa LGU Dapitan

Si Teobaldo Mirafuentes, 59 ang panuigon, ang nagub-an sa iyaang sakayang pangdagat agi sa kakusog sa hampaksa balod ug ang iyang balay naabtan pud sa tubig sa dagat.

Ang iyaang kasinatian gi-post kini sa Facebook ni Ariel Daymiel, 34 ang panuigon, nga silingan ni Mirafuentes ug kini nakit-an sa atoang Serbisyo Bilis sa Barangay Team. Sa walay paglangan mihatag ug bag-ong sakayan nga hinimo sa fiber glass nga adunay katas-on nga 20 feet si Mayor Rosalina “Nanay Nene” G. Jalosjos pinaagi kang Executive Assistant to the City Mayor Seth Frederick “Bullet” P. Jalosjos ug sa City Agriculture Office nga gipangulohan ni Mr. Cyril Patangan.

Si Federico G. Lumindong, 56 ang panuigon, ang nagub-an usab sa iyaang makinang de motor para sa iyang sakayang pandagat ug midangop siya kang Baranggay Kapitan Arniel R. Lacquio ug nagpatabang pud sa iyaang nasinati. Sa wala paglangay, nahibalo ang kagamhanang lokal ug siya nahatagan ug bag-ong Golden Horse Brand 6.5 Horsepower nga makinang pangdagat.

Kagahapon, Oktubre 13, gihatag na ni City Agriculturist Cyril Patangan ang mga bag-ong sakayan ug makina pangdagat sa mga mananagat nga gisaksihan nilang Konsehal Ronie “Pareng Hope” Jarapan, Baranggay Kapitan Lacquio, mga opisyal sa Maritime Industry Authority (MARINA), ug mga opisyales ug mga residente sa maong barangay.

Dili masukod ang kalipay ni Baranggay Kapitan Lacquio sa kanunay wala pagdugay ug hinanaling aksyon sa kagamhanang lokal sa Dapitan ug gimandoan mismo ni kanhi kongresista Bullet Jalosjos.

Nihatag usab ug mensahe si Konsehal Jarapan nga dili malimot sa pagpasalamat sa labaw makagagahom sa mga gasang nadawat labi na sa panahon sa kalamidad kon diin naapektohan ang panginabuhi sa mga mananagat kay ang mga opisyal sa gobyerno gihimo lang na mga sundalo para sa paghatod sa maayong serbisyo sa mga katawhan, kanunay sa bisan unsang panahon.

Dako nakong pagpasalamat ni Mayor Rosalina “Nene” Jalosjos, kanhi congressman Bullet Jalosjos, Congressman Kuya Jon Jalosjos, ug sa mga konsehales kay dili nako mahunahuna ang kalisod sa panginabuhi na walay sakayan. Karon, naa na koy bag-ong sakayan. Ampingan ko gayod kini pag-ayo kay swerte kaayo ko nga nahatagan sa gobyerno. Mahatod na jud tawon nako ang akoang mga natigom na junk para ipatimbang ug makapangisda na balik inig ayo sa tempo sa panahon,” saysay ni Mirafuentes pagkahuman madawat ang bag-ong 20 feet, fiber glass boat.