Hingpit na nga matuman ang dugay nang handum sa katawhang Lumad sa lungsod sa Sibuco, Zamboanga del Norte human masugdan ang pagtukod sa Sibuco Tribal Hall, nga gilauman nga mahuman sulod niining tuiga.
Kini nga proyekto natuman pinaagi sa suporta ug paningkamot sa Opisina ni Congressman Ian Amatong, subay sa dugay nang panawagan ug adbokasiya sa mga lider sa Indigenous Peoples (IP) sa munisipyo. Ang ideya sa pagtukod sa tribal hall unang gisugyot sa kanhing Indigenous Peoples Mandatory Representative (IPMR), Hon. Kambal Salihon, ug gipadayon ug gipakusgan sa karon nga IPMR nga si Hon. Akmad Tangkapa.
Gibanabanang mokantidad og P7 milyones, ang duha ka andana nga istruktura giila isip unang modernong tribal hall sa tibuok probinsya sa Zamboanga del Norte. Gituyo kini nga mahimong sentro sa mga panagtigom sa tribo, mga kalihokan alang sa pagpanalipod sa kultura, ug opisyal nga buluhaton sa Indigenous Peoples community.
Sa higayon nga mahuman, gilauman nga ang Sibuco Tribal Hall dili lamang makabenepisyo sa kasamtangang mga lider kondili usab sa umaabot nga mga henerasyon, pinaagi sa paghatag og permanenteng lugar alang sa pagpanday sa liderato, pagpadayon sa kultura, ug paghisgotan sa mga desisyon nga may kalabutan sa komunidad.(IKEN B. GULLEM)
SOURCE: ZAMBOANGA DEL NORTE PROBINCIAL NEWS NETWORK/ Photo Courtesy: Hon. Absar Caril | Efraem Roldan