Dugang nga mga klasrom ang matukod sa probinsya human pormal nga gipirmahan ang Memorandum of Agreement (MOA) tali sa Department of Education (DepEd) ug sa lokal nga mga panggamhanan alang sa implementasyon sa Nationwide Classroom Building Program.
Gitumong ang programa sa pagsulbad sa kakulang sa mga klasrom ug paghatag og mas angay nga palibot sa pagkat-on alang sa mga estudyante sa Zamboanga del Norte. Kabahin sa kasabutan ang Probinsya sa Zamboanga del Norte, Dakbayan sa Dipolog, ug Dakbayan sa Dapitan, nga nagpakita sa hiniusang paningkamot aron mapalambo ang kalidad sa edukasyon sa lalawigan.
Gipahayag ni Gov. Darel Uy ang pasalamat kang Education Secretary Juan Edgardo “Sonny” Angara ug sa mga opisyal sa DepEd tungod sa pagsalig ug pakigtambayayong sa pagdala sa maong programa ngadto sa probinsya.
Matud niya, ang dugang nga mga pasilidad sa eskwelahan makatabang sa paghatag og mas komportable ug episyenteng kahimtang sa pagkat-on alang sa mga kabatan-onan.(IKEN B. GULLEM)
Source: Gov Dare Uy