Gipakusgan sa Department of Social Welfare and Development (DSWD) ug mga partner government agencies ang ilang koordinasyon aron masiguro ang hapsay nga pagpatuman sa Philippine Community Resilience Project (PCRP) sa Zamboanga Peninsula ug Sulu.
Gipormal ang Regional Steering Committee (RSC) ug Regional Technical Working Group (RTWG) atol sa organizational meeting niadtong Agosto 6 sa Dipolog City, diin gitakda ang mga mekanismo alang sa pagdumala ug teknikal nga pagpatuman sa programa sa rehiyon.
Kining PCRP usa ka lima ka tuig nga programa ubos sa DSWD-KALAHI-CIDSS nga nagtumong sa pagtabang sa mga komunidad sa pag-atubang sa kakabos, mga risgo sa kalamidad, environmental challenges ug pagsaka sa gasto sa panginabuhi.
Gipangulohan ni DSWD Field Office IX Regional Director Riduan P. Hadjimuddin, CESO III, ang organizational meeting, uban ang Department of the Interior and Local Government (DILG) Region IX isip co-chair.
Ang pagporma sa duha ka regional bodies gisundan sa pag-apruba sa Regional Development Council IX Resolution No. 044, Series of 2026, atol sa ika-191 nga miting sa konseho.
Aron malikayan ang pagsapaw sa mga buluhaton, gitakda sa DSWD ang kasamtangang Regional Inter-Agency Committee (RIAC) isip Regional Steering Committee sa PCRP, nga nahiuyon sa structure sa National Steering Committee sa programa.
Sa Zamboanga Peninsula ug Sulu, 68 ka municipalities ang giila nga sakop sa implementasyon sa PCRP. Ang unang batch naglangkob sa 48 ka municipalities gikan sa Zamboanga del Norte, Zamboanga del Sur, Zamboanga Sibugay ug Sulu, samtang 20 ka municipalities ang sakop sa ikaduhang batch.
Adunay P50.706 bilyon nga pondo ang PCRP alang sa lima ka tuig nga implementasyon gikan 2025 hangtod 2030, nga gikan sa World Bank loan, national government support ug counterpart contributions sa mga participating LGUs.
Gilauman nga pinaagi sa bag-ong regional coordination mechanism, mas mapahiusa ang mga ahensya sa gobyerno sa pagpatuman sa mga community-led intervention ug mapalig-on ang kapasidad sa mga komunidad sa Zamboanga del Norte ug sa tibuok Zamboanga Peninsula ug Sulu sa pag-atubang sa mga kalamidad ug uban pang development challenges.(IKEN B. GULLEM)
Source: DSWD Field Office IX
Zamboanga Peninsula