Gipahibalo sa Department of Science and Technology–Science Education Institute (DOST-SEI) nga abli na ang aplikasyon para sa 2026 Science and Technology Undergraduate Scholarship Program alang sa mga graduating Grade 12 students sa tibuok nasud.
Ang programa nagatuyo nga matabangan ang mga estudyanteng may kahanas sa siyensya ug teknolohiya apan kulang sa pinansyal nga kapasidad. Anaa kini sa duha ka klase — ang Republic Act 7687 scholarship alang sa mga estudyanteng gikan sa kabus nga pamilya ug ang Merit scholarship para sa mga dekalidad nga estudyante base sa resulta sa eksaminasyon.
Ang mga scholars makadawat og benepisyo sama sa ₱8,000 matag bulan nga allowance, ₱10,000 learning materials ug connectivity allowance, ug hangtod ₱40,000 matag tuig para sa tuition. Ang aplikasyon himuon online hangtod sa gi-announce nga deadline sa DOST-SEI. (Jeniffer Jr. Delica)
Source: Zamboanga del Norte Provincial News Network