DIPOLOG CITY, ZAMBOANGA DEL NORTE — Pormal nang giablihan sa Department of Science and Technology o DOST ang Satellite Calibration Laboratory sa DOST-ZDN Upper Turno Office ning dakbayan niadtong Agosto 12, 2026, aron mapalapdan ang access sa kasaligan nga calibration services alang sa mga industriya ug negosyo sa Zamboanga del Norte ug kasikbit nga mga lugar.
Gipangunahan ni DOST Secretary Dr. Renato U. Solidum Jr. ang inaugurasyon uban nila ni DOST Undersecretary for Regional Operations Engr. Sancho A. Mabborang, DOST Assistant Secretary for Countryside Development Engr. Maria Teresa B. De Guzman ug DOST IX Regional Director Dr. Rosemarie S. Salazar. Kabahin ang maong kalihukan sa 2026 Zamboanga Peninsula Regional Science, Technology and Innovation Week.
Pinaagi sa bag-ong laboratoryo, dili na kinahanglan nga ipadala pa sa mas layo nga mga laboratoryo ang mga measuring instruments alang sa calibration, nga makatabang sa mga kliyente sa pagminus sa oras ug gasto. Gipasiugda usab sa industry sector ang kamahinungdanon sa mas accessible nga calibration services alang sa mga negosyo ug industriya.
Gitapos ang kalihukan pinaagi sa ribbon-cutting ug facility tour diin gipakita sa mga bisita ang laboratoryo ug ang mga kapabilidad niini. Ang pasilidad nagdugang sa science and technology services nga anaa na sa rehiyon, ilabina alang sa mga industriya ug komunidad sa kabanikanhan.(JENIFFER JR. DELICA)
Source: DOST Regional Office No. IX